نبذه بسيطه عن الشاعر الكبير ســعــد الــحـــريٌـــص

وينك نحل صوتي من الحزن والصمت=يا ضحكة الدنيـا وضحـك الليالـي
باسمك بكى صوتي وباسمك تبسّمت=للي بقى للحـب منـك وبقـى لـي
شفني على كثر الجفـا مـا تعلّمـت=لو مـا ورا فرقـاك هـذا وصالـي
شفني ذكرتك همت بك كثر ما همـت=ما ضاق بك قلبي ولا ضـاق بالـي
عن كل عين ما لها دمعتـك صمـت=يا عيد قلبي حاجبـك هـو هلالـي
انا حرمنـي منـك وقتـي وحرّمـت=عقبك اعشق عيونهـن يـا حلالـي

____________________________

على حد الكلام وممتلي صـدري مطـر وسيـول=وقفت ولا معي غير الورق في صدقـي وخوفـي
وقفت وقلت اقول ؟ وكل ما فيني صرخ بي قـول=وانا وإن جيت اقول اللي ابقوله بحـرث حتوفـي
ابكتب لي قصيدة لا ظلال ولا لها جرة ولا مدلول=واخاف من الكلام يخونني واخـاف لـو يوفـي
ابرسم في الرمال الناعمه خطوه بـدون إرجـول=تسولف للهبايب عـن ذهـاب العمـر ونكوفـي
زماني يزرع في عيني دموع ولا جنى المحصول=أحسبنّـي بكيتـه والحصـى والرمـل مذروفـي
ضميت ومد لي بعض السراب بكفـه المشلـول=ورويت من العطش وأثر الجفاف يبلـل طروفـي
في عيوني من مهف الشمس صوت وزول=على حد النظر خيايلتهـم ليـن انحنـى شوفـي
وهبّت من شمال وقلـت هـذا بردهـا مرسـول=وحطبت من الضلوع وقمت اشب النار لضيوفـي
هلا باللي لفاني من ورى دربي مـن المجهـول=ابغنّي واطرد النسيان الأسـود واضـرب دفوفـي
في قلبي صمت ليل وخوف خطوة وارتعاش حجول=في قلبي ضحكها وأنفاسهـا ودمـوع معروفـي
في قلبي دبك خيل وهمهمـة فرسانهـا وطبـول=في قلبي برد ليلة وصفها مـا يمـدي وصوفـي
بدا (.....) على اطراف الليالي والحديـث يطـول=وهي في عمرها ليله قمرهـا يوجـع حروفـي
هي من خوفها ذاب الكلام في ريقهـا المعسـول=وانا اجمّع كلامي وارفـع اللـي طـاح بكفوفـي
ومرّينا علـى البيـت القديـم وبابهـا مقفـول=انا والليـل وجـروح السنيـن وطـوّل وقوفـي
روت عيني من غيوم الظلام ونورهـا المقتـول=وانا وإن قمت ابسند شمسها طاحت بها كتوفـي
رقيت اطول همومي لين شفته بالحشـا مذلـول=وابرقـا لا دريـت ان السمـا تتشـوّق لنوفـي
وفي ارض المحال الممحله ما ينبـت المعقـول=وانا راعي مشاعر والهموم تنـام فـي جوفـي
انا ما جيت ابعدل منعوج جيت اعـوج المعـدول=واشب النار بأطراف القصايـد واشهـر سيوفـي
الا يا جرح يا جـرح القصيـدة والظمـا مبلـول=عجز فيك الكلام وكذبتـي مـا تستـر حلوفـي

___________________________________________

جيت هارب تطاردني الهجوس=وكـل شـيٍّ جميـل ٍ كبّنـي
يا حبيبي وانا خوفي ضروس=أطو رمشـك علـي وخبّنـي
ريح عينك ملت عيني طعوس=والبكا في حشـاك يصبّنـي
كم تعذبت في فهـم النفـوس=من كرهنـي يقـول يحبّنـي
وكم حلمٍ تغربلـه الهجـوس=وانت حلمٍ طفى ثـم شبّنـي

يا حلو صوتك يجي دايم حزيـن وصـدوق=يسكـن بـه البـرد ويبلـل ثيابـه بكـاك
مليان بالود واحسـاس الحبيـب الشفـوق=حنـون مـن أول عيونـك لآخـر مـداك
مليت ظلما الفراق وكان صوتـك شـروق=يا شين بعدك ويا كثر الجفـا فـي جفـاك
بيني وبينك تعـب بينـي وبينـك فـروق=دونك مشاويـري البيضـا وحزنـي وراك
إن طوّلت في عيونـي ممحـلات البـروق=والله لأضحك رضا لو ما اضحكت لي سماك
ظماي يترك على صـدر الليالـي حـروق=وإلا انت تظما ويا برد الظما فـي ظمـاك
شحيح انا فيك لو جفت في دمـي عـروق=اشح في ماك وزروعك واشـح بحصـاك
اقول ابشرب وشحـي فيـك عيـا يـذوق=مرارة النفس فينـي مـا غواهـا غـلاك
هذا قصيدي بكف الريح مـا لـه حقـوق=يا ما ويا ما اخذ منـي ويـا مـا عطـاك
والله لو هو بكره النفـس لألحـق لحـوق=لكنه أنهـى حيـاة الحـزن حيـن ابتـداك

هذا طريقي واعرف انه طريقك وجيـت=وانتي بعيدة وانا عـوّدت قبـل السـلام
لو التعب في طريقك كثر ماني مشيـت=ما رحت راجيك لو جيتك ومالي مـرام
لو ما دريتي انا يكفينـي انـي دريـت=احيان ما يشعر القايـل بطعـم الكـلام
لك مني انساك وانهيها وانا مـا بديـت=ما احد يشيل بعيونه نـور يـم الظـلام
كان الجفا جرح بيشيب الزمن ما شفيت=ما طاب جرحي ولو مني يطيب الغـرام
كان الجفا صح ما اخطيتي وانا ما خطيت=ما هو بسلم العرب عيبه ولا هو حـرام
كاني لقيت بعيون الليـل دمـع وبكيـت=مصيري ألقى ورى حبك عيوني وانـام

أنادي لك وأنا لو تاقف جروحي علـى الأبـواب=أبسهر مع سوالفنـا وابنسـى بالسهـر ليلـك
أنا مليت عذري واعذري يـا أجمـل الأحبـاب=تعـب دمعـي ينـادي للبكـا ويـرد منديـلـك
ذكرتك والحشا نصفه عرب ساحل ونصف أعراب=تماكنت المراكب قلـت أببحـر وامكنـت خيلـك
هنيّك يا الصحاري وإن ضميتي ما يموت تـراب=هنيّك لو يموت الطين مـا هـد الظمـا حيلـك
هنيّك يا السحايب وإن بكيتي ما لحقـك عتـاب=وأنا للدمع فينـي مثـل لـلأرض فـي سيلـك
أحبك والسما تمطر أحبـك والجـروح أعشـاب=أحبك يا سحابـة روّحـت والأرض تبكـي لـك

مريت فينا ليلـة مالهـا وصـف=في وصفها ضاقت علـي العبـارة
رحبه جميله ناعمه جوهـا تـرف=مثلك حبيبي واسعدتنـي الزيـاره
فعيونك التحنان وفقلبـك العطـف=رغم السنين وفي سلامك حـراره
نظرتك حب وبسمتك كلهـا لطـف=يلوق لك ثـوب البهـا والطهـاره
من جرحك الأول إلى جرحك الألف=قصيدتـي بيـن الألـم والمـراره
واللي كتب فرقاك ما جاز لي حرف=عقبك ولا قلت افدحي يا خسـاره
اقول في نفسي ورجلي على جرف=إمـا عمـار القلـب والا دمـاره
لا طاب لك جرح ولا منقطع نـزف=والوقت مر وحان رفـع الستـاره

هبت جنوب وطـاح بـرد المكاتيـب=ويا كثر ما هـب الجنـوب وذكرتـه
يملأ حضوره من حضوري وانا اغيب=ويا ما غيابي فـي غيابـه حضرتـه
انا جا مطر صارت له اضلوعي اشعيب=وان راح ريـح ٍ طيـر اللـي بذرتـه
طال السكوت ومال صمتـي مطاليـب=غير الكـلام اللـي وقـف وانتظرتـه
جنبت لو مالي عـن الدمـع تجنيـب=من وين ما صديـت فينـي شعرتـه
واصمتي اللي صار فعيونهـم عيـب=واجرحي اللي لـو فضحنـي سترتـه
لي صاحب ٍ يمـلا كفوفـه تراحيـب=لو لا الحيا من ضحكته مـا اعتبرتـه
يا صاحبي ما هـي عليـا مقاضيـب=عذروبي انك ذخـري اللـي ذخرتـه
عذروبـك انـك شوهتـك الاكاذيـب=عذروبك انـك جـاك طيـب ونكرتـه
ان جيتنـي بفـراق زود العـذاريـب=لاجيك انا مـن زود صبـر صبرتـه
للطيـر جنحـان وريـش ومخاليـب=لكـن يضيـع صيدتـه فـي غبرتـه
ومن جزم نفسي يوم صار الردى طيب=حلمـي قبـل لا يكسرونـه كسرتـه
ومن راح مني قلت يا علـه مصيـب=دورت لـه عـذر ٍ كريـم وعذرتـه
للي يبـي بعـدي انـا مانـي قريـب=اما ربحنـي وإلا انـا مـا خسرتـه
قلبـي خويـي مالقلبـي معـازيـب=واللـي حقرنـي مـن رداه احتقرتـه
رغم الجروح اللـي بقلبـي معاطيـب=حبيـت كفيـن الزمـان وشكـرتـه

البارحه غنيت يـا حـادي العيـس=واليوم صمتك عن عيوني حدانـي
اليوم تلعب بي ريـاح الهواجيـس=ولادري عشانك ضيقتي أو عشاني
ما بين لوعات الجفا والوساويـس=البرد ساكـن فارتعـاش المحانـي
وانا حبيس الصمت سجن الاحاسيس=ضاق الزمان ولا وسعنـي مكانـي
والنور طعمه في عيون المحابيـس=مرٍ مثـل طعـم الكـلام بلسانـي
متى بشعري يزهـرنّ الكراريـس=ومتـى بقلبـي يمطـرن الأغانـي
بيت الشعر ماهو كـلام براطيـس=ليـت القصايـد بالدفاتـر مبانـي
والله ليفرق شعر من يرجي الكيس=عن شعر من ينحت صخور المعاني
ويبان فرقي باختـلاف المقاييـس=حتى تحس بصدق وش كثر اعانـي
والا الأماني راس مـال المفاليـس=عزي لمن كانـت جـداه الأمانـي

ضاقت الارض واشتد الزمان=راح وقت الهموم الشاعرية
من فقدتك وانا ماني بأمـان=والقصايد ماعادت منبريـة
كنت اجيلك وكان الشعر كان=ورد روحي وقلبي مزهريـة
اكثري حب واكثرك الحنـان=وش كثر كانت الدنيا طريـة
من حنانك يضيق بنا المكان=وين ما اروح القاك اكثريـة

غابت الشمس وإلا الحزن له مغربه=وين أبغرب وأنا حزني غروبه ثقيـل
مجدبه ياجروحي والسماء معشبـه=ساكنه والهوى ميل جريـد النخيـل
بارده ياحروفـي والدفـاء موهبـه=بارده مثل برد الخـوف والمستحيـل
صوتٍ أبعيد في قلبي ياليـت أقربـه=وبين قلبي ومابيني طريـقٍ طويـل
ليت حزني مثل حزن البشر وأكتبـه=وليت دمعي مثل دمع العيون ويسيل
أشهد أني ردي حـظ وردي تجربـه=وأشهد أني على بعض المشاعر بخيل
أيه مذنب في هالدنيا وهـي مذنبـه=من دفا حلمي الطيب لبـرد الرحيـل
عذري اللي متعبنّـي وأنـا متعبـه=مال قلبي على بعض الهقاوي دليـل
كل طيرٍ له اللـي بالسمـاء يجذبـه=وكل غصنٍ تجوز له الهبايب يميـل
صرت أقول الكلام المـر وأستعذبـه=صرت أخاف الدفاء لوني وحيدٍ نحيل
كم صبرت وليال الصبـر مستغربـه=لين قلة حلاة الصبر لو هـو جميـل
الزمن صعب والنسيان يـا مصعبـه=والدفاتر نشيّلهـا الهمـوم وتشيـل

يا حادي الركب لا تنطح هجير الشمـوس=وأحجب ظما البيد عن ماها و عن عيسها
كل ٍ علـى قـد فهمـه و الليالـي دروس=وهل الحجـا تفهـم الدنيـا و تدريسهـا
و الشجره اللي علت في جذعها نخر سوس=لو تصبر الريح عنها كـان مـا جيسهـا
ابقطع الصمت في صوت ٍ كما حد مـوس=وأقرع طبول الوفا و أضـرب مراويسهـا
ما كانت الحرب إلا حرب روم و مجـوس=وإلا أرضهـا يعربيهـا فـي تضاريسهـا
في قدومها تفتن الأنظـار مثـل العـروس=وعجوز شمطى إذا أقفت فـي هداريسهـا
ليا قبست قل طالبهـا و طـاب الجلـوس=لو قلـت يـا كثرهـم فينـا معاريسهـا
ماهي بداحس و غبراهم و حرب البسوس=جحافـل الـروم تزمـي فـي كراديسهـا
أقول وجه الزمـن باكـر علينـا عبـوس=والله يكـذب فـزع نفسـي و أحاسيسهـا

العذر مكتوب لاصـار الخطـاء مقـري=آسف على ضحكتي وآسف على احزاني
خطـاي معـذور والا غلطتـي عـذري=ومرارة العذر في قلبي وفـي لسانـي
مدري وش اللي ذكرت وضاق به صدري=مدري وش اللي نسيـت ولا تناسانـي
لبست انا ثـوب لاطولـي ولا قصـري=ياطيبـه القلـب ويـن القلـب ودانـي
سنتين من عمرها مرت ومن عمـري=سنتين احـس الزمـن فيهـا تعدانـي
سنتين مرت حياتـي مـن ورا ظهـري=والحب سجنـي ومسجونـي وسجانـي
والشعر مطرود من قلبي ومـن فكـري=سنتين ماني ب انا مانـي باحـد ثانـي
غنيت للنـاس والدنيـا علـى خبـري=والشعر في دفتري مغـرور وانسانـي
غنيـت للحـب يـوم عيونهـا تغـري=يـوم الوفـا والكـلام الطيـب الحانـي
غنيت للدمـع يـوم أن البكـى كبـري=واليوم انا اكبر من دموعـي وحرمانـي
اليوم ماعاد يمدي اللـي جـرح يبـري=مليـت كثـرت خطاياهـم وغفـرانـي
مليت انا الشعر مل الشعر من شعـري=مليت انا الحـب مـل الحـب وجدانـي
و لو هي عليه عزيز النفس من صغري=ما شاور القلب فـي كرهـي لعدوانـي
ان رحت ياكثرهم وان جيـت ياكثـري=ضاقت بي عيونهم لـو كنـت وحدانـي
تعبت وازريت مامليـت مـن صبـري=ليت الـذي راح منـي كثـر ماجانـي
احيان ودي اطيـح مـن التعـب وازري=تشيلنـي عزتـي وسـلـوم جـدانـي

أنفض كلامك عن غباره=صمتك فقلبك له رنيـن
قلبك ماكـان إلا مغـاره=ترسم بها جرحٍ حزيـن
رسمٍ نقشته في حجـاره=يشبه رسـوم الأوليـن
ياوجهٍ أخجل من وقـاره=حلو النبا سمح الجبيـن
ربح الزمن هذا خسـاره=والخافيـه باكـر تبيـن
طاحة فأمريكـا عمـاره=هزت ديـار المسلميـن
منها بدت حرب الحضاره=حـربٍ تـروع الآمنيـن
ماتاسع الجرح العبـاره=ويضيق فالصدر الآنيـن
أصعب من الموت أنتظاره=والأصعب العيش المهين

صحيح أحبك وأنـت والله تنحـب=لكن هذاك احرق فـؤادي وأذابـه
وش غيّر الدنيا وهي جدّها لعـب=وبدّل بشمس الضحك ليل الكآبه ؟
لا اقبل عليّ بضحكةٍ تسرق اللـب=فتحت له قلبـي وشرّعـت بابـه
مشي السحابه لا تريّث ولا خـب=سبحان من خلّى النقيض يتشابـه
لا والذي غيره حشا مـا لنـا رب=كنها مشى والأرض تحته سحابـه
لو ما تثنّى ما دريت الهوى هـب=تـرفٍ يميّلـه الغنـج والذرابـه
تفاح فتنـه فـي محيّـاه وعنـب=أجوع له واضما ضماه وشرابـه
لي عضّ عنّابه وجمر الغضى شبّ=في شفّته قلب البعيد اكتـوى بـه
عين اشقرٍ ما طار صيده ولا طب=ضاقت عليه من الرعاب الرحابـه
حرٍ يذبّ الصيد مـن مخلبـه ذب=في نظرته عز وجمـال ومهابـه
إليا شلع كنّه حجر والسمـا جـب=يهوي بها كن الصعـود انجذابـه
والليل كنّ الليل في شعـر يصـب=ّشلال من فوق المتون انسكابـه
والكلمه اللي بالهوى ما لها طـب=لا انت بسما حبه ولا فـي ترابـه

ما اقول انا غير لكني اقـول ان ذهبـت=يتذكر الحب في النسيان من غـاب لـه
تفرق الغيم عن راسي وانا مـا شربـت=مابـل قلبـي بمـاه ولا ارتـوى وابلـه
قد شدني لمع برقـه بالسمـا وانجذبـت=ظميان والروح من كثـر الظمـا ذابلـه
ياحارس التيه انت بصفحتي وش كتبـت=اللي قضيت العمـر كلـه وانـا اعابلـه
لو مايقولـون عليـت البكـا وانتحبـت=بس بيقولون مجنون .. الهـوى هابلـه
البارحه كنت احس انـي كثيـر اقتربـت=واليـوم ابعـد وياخوفـي مـن القابلـه
ابطلب العـذر سامحنـي حبيبـي تعبـت=واببتعد عنك لـو نفسـي مهـي قابلـه
عاشرت انا الصدق في دربي واظني كذبت=مره .. وطاح القمـر فالليلـه الحابلـه